2026-01-22 21:41
حرص ناصر ماهر، لاعب الزمالك السابق والمنضم حديثًا إلى صفوف نادي بيراميدز، على توجيه رسالة مؤثرة لجماهير القلعة البيضاء، عقب انتهاء مشواره مع الفريق.
ونشر ناصر رسالته عبر حسابه الرسمي على موقع إنستجرام، وقال: «مش عارف أبدأ منين، لأن في حاجات مش سهلة تتقال، خصوصًا لما تكون بتتكلم لجمهور عظيم زي جماهير الزمالك داخل القارة وخارجها. اسمحولي أعبر عن حبي واحترامي ليكم، والله مش مجرد كلام».
وأضاف: «من أول يوم دخلت فيه النادي، وأنا حاسس إن المكان ده فيه حاجة تتحب، يمكن عشان ده كيان كبير، أو لاعبين كبار وشخصيات محترمة، أو عشان الجمهور المختلف بأجوائه ودعمه. بس في الآخر، الكورة ممكن تخليك تسيب مكان بتحبه، وده جزء من اللعبة، وأنا بحبكم جدًا والله».
وتابع: «النهارده آخر يوم ليا في نادي الزمالك، النادي اللي تشرفت إني ألبس تيشيرته التاريخي ودافعت عنه بكل إخلاص وحب. أنتم خلتوني نجم بجد، ودائمًا بقول إن ربنا أكرمني بجمهور الزمالك».
وأوضح ناصر أن الرحيل جاء نتيجة الظروف المالية الصعبة للنادي، وقال: «يمكن الرحلة خلصت دلوقتي بسبب ظروف النادي، وأتمنى أكون جزء ولو بسيط في حل الأزمة المالية، وأقدر أساعد النادي، لأن الزمالك كبير ويستحق إن الواحد يضحي عشانه. بالنسبة لي، الرحلة لسه فيها فصل تاني.. إمتى؟ الله أعلم».
وختم رسالته بالشكر لكل من ساعده في مسيرته: «بشكر كل زملائي اللاعبين الرجالة في كل المواقف، وبشكر إدارة نادي الزمالك برئاسة الكابتن حسين لبيب، وكل المدربين اللي اتدربت معاهم: شكرًا جون أدوار، شكرًا كابتن عبد الناصر محمد، شكرًا كابتن أحمد سليمان اللي خلاني أكون موجود داخل نادي الزمالك، وكمان بشكر الأوفياء.. جمهور الزمالك العظيم الداعم الأول للنادي. آخر حاجة هقولها: أنا دخلت النادي وقلت أنا بحب الزمالك، ودلوقتي وأنا ماشي بقول هفضل أحب الزمالك».
